Evangelische Kirchenordnungen des XVI. Jahrhunderts

Wolfenbüttel

und kastensegel, by den radt gelecht werden.
Darinne ock geschreven schal werden, wenn de
rechenschop geschüt, wat sick de güder vor-
mehret hebben. Overst de kastendiaken scholen
eine uthschrift des inventarii by sick beholden.

Kastendiaken.

Tho solcken gemeinen kasten edder schatte
vor de armen und kerckendenere scholen erwelt
werden sös kastendiaken edder kastenheren,
twe uth dem rade und veer börgere uth der
gemeine.

De solcke lüde scholen syn, alse steyt Act. 6
[3], 1. Tim. 3 [2 ff.]: ehrlike lüde, nicht lögenere,
nicht drunkenbolten, nicht bedregere, de ehrlick
husholden mit eren echtenwyven und kinderen,
de vul hilliges Geistes und wysheit sind, dat is,
de dat geheimnisse des evangelii edder des ge-
lovens in reiner conscientien hebben, de so vor-
stendich sind, dat se wol weten, wor se geven
und borgen scholen, dat nicht dat kastengut
ane not vorringert werde. De ock so fram syn,
dat se de armen und nottroftigen nicht ver-
sümen.

Disse scholen vlitich inmahnen und uthgeven
und dat alle erem schrivere schriven laten, alle
solde der kercken- und scholdeneren scholen
se alle verndeljars uthrichten. Item: de schölen
neven dem rade vorschaffen bequemelike wonin-
ge den predicanten und scholgesellen, und wenn
de scholgesellen ehelick werden, so schal men
dem eheliken gesellen eine sunderlike woninge
bestellen, so lange he in dem ampte blifft. De
kastenheren scholen ock buwen und in buwe-
likem wesende holden der kercken- und scholen-
denere hüsere. Item: de kerckhöve scholen se
genochsam befreden, wente der Christen be-
greffnisse scholen wy ehrlick holden, darumme
dat wy gelöven de upstandinge der doden.

Alle Sundage des namiddages na der predike
(welcke predike umme seyers twelve schal ge-
scheen) scholen de kastendiaken thosammende
kamen, dar ere kaste is, umme der armen wil-
len, de se up dem register angeschreven hebben,
den se thogesecht hebben, alle weke wat tho
gevende, dem einen mehr, dem anderen gerin-

ger na gelegenheit. Und sus ock tho ratslagen,
efft wat van nöden were der kasten halven.

De kastenheren scholen sick vorschaffen einen
geschickeden schriver und den mit der borger-
meistern und kerckheren rade und willen an-
nemen.

De schriver schal ein framer börger syn, de
ehrlick husholt, de vorstendich is up rekenschop,
de dat gemeine kastenböck wol vorstan und de
rekenschop wol schriven kan gegen de tidt,
wenn men rekenschop schal dohn.

De kastendiaken scholen alle jar in der weken
vor Palmsondage rekenschop dohn up dem rat-
huse dem kerckheren und dem rade. Des Son-
dages thovorn schal yd vam predigstole aff-
gekündiget werden, dat de rekenschop gescheen
schal, hefft jemand wat inthoreden wedder de
kastenheren edder weth sus wat mehr gudes
der kasten tho gude, de mach sick up de tydt
up dat rathus maken und rede dar frilick der
saken tho gude und nicht thom vorderve. De
döre schal em und anderen borgern, de darby
willen syn, apen stan.

Na der rekenschop scholen denn sülvest de
twe radespersonen, de kastendiaken ein jar
lang sind geweset, fry und los syn van dissem
ampte, ock de börgere, de by der kasten sind
geweset. Und men schal en na guder rekenschop
danken und balde, ehr men geyt vam rathuse,
schal darsülvest de parhere und de radt sampt
allen, de dat jar diaken sind gewest, erwelen
tho der kasten upt nye einen van den beiden
ratheren, de des vorgangen jares sind kasten-
heren geweset und noch einen ratheren, de des
vorgangen jares nicht is kastenhere geweset.
Dartho ock twe borgere van densülvigen, de
kastendiaken ein jar lang sind gewest, und
twe börger, de im vorigen jar nicht sind kasten-
diaken gewest.

Wente wen men idel nye alle jar erwelen
scholde, de nicht mit der saken ummegegahn
hedden, so müchte uth unerfarenheit de gemeine
kaste schaden nemen. Darumme is yd gut, dat
sülcke dre erfarne börgere noch ein jar darby
blyven, van welcken de anderen ock könen leren
und angevöret werden. So moten de dre blyven

78